Kaupapa: Waka Ama

Tahiti students embrace experience at Waka Ama Secondary School Champs

updated Mere McLean
  • Waikato/Te Waiariki

Ko ngā whakataetae waka ama kura tuarua anake te hui ki tēnei taha o te Moana a Kiwa e tae mai ai ngā tauira nō te kāreti o Paopao o Tahiti.  Mo te nuinga o ngā tauira toru tekau mā rua kua tae mai ki Aotearoa koinei to rātou wā tuatahi ki waho atu i tō rātou kāinga. 

Ka rere ana te wehiwehi, kia mau ki te hoe. Koinei te āhua mo te tima waka ama hanumi, kei raro iho i te tekau ma ono tau nō te kāreti o Pao Pao.  Ko te tuatahi ki te puta, ā, te kapa whakamutunga ki te hoki mai.  Engari ka mau tonu te wheako nui ki roto i tēnei tauira kua tae mai ki Aotearoa mo te wā tuatahi.

Hei tā Mc Callum Poehere mai te kuratuarua a Pao Pao, “New Zealand is very beautiful, it's cold and the competition is cool.”

Ko te kāreti o Pao Pao tētahi o ngā kura tuarua iwa tekau mā whitu kua tae mai ki tēnei hui ki raro i ngā whakahaere o Te Arawa. 

“Ko wa tātau nei hiahia ki te eke noa atu ki tērā taumata ki te kotahi rau, tērā wā tātau nei tumanako kei roto i a mātou,” hei tā Paraone Pirika, he uri nō Te Arawa.

Nā runga i te hiahia kia nui ngā kura e tae ana ki konei, ka piki hoki te taumata o ngā pūkenga waka ama ki roto i ngā kura. Ko te kōrero kei muri i tērā, he uaua te kī ko wai ngā kura tino toa.  

Hei tā Pirika, “Ko ngā toa, nō te Turanga nui a Kiwa, engari, inaianei e tata ngā kura katoa i te toa i tēnei kaupapa.”

Ko te rā tuatahi tēnei mo te whakataetae kura tuarua waka ama ā-motu.  Ka timata ngā whiringa whaiti hei te ahiahi ō āpōpō.