Kaupapa: Commonwealth Games

Sevens Gold Medals Years in the Making

James Perry

Ko te whai utu i te hinganga e rua tau ki muri ki ngā whakataetae Orimipia te whainga a ngā kapa takiwhitu wāhine, tāne anō hoki ki te taumāhekeheke hoawhenua nei. A, nā te mahi tahi ea ai i a rātou hiahia. 

Hei tā Kelly Brazier, te wāhine nānā te kapa takiwhitu wāhine i riro i te mētara kōura, he mamae nui kua ngau kinotia i ngā rua tau kua hori. Arā, nō te rirohanga o te mētara kōura i te Tai Koura kua ea te mamae. 

He kōrero e tautokohia ana e Tim Mikkelson te kāpene takirua o te kapa tāne. Hei tāna anō, he whakapono tō te kapa ka tāea, hēoi me tukuna te katoa ki te whīra kia angitū ai rātou. 

Ehara hoki i te mea i tumeke ngā kapa i te ōruatanga o ngā wikitōria e rua nei. Ka haratau rāua ki a rāua anō ki Mt Maunganui, he āhuatanga motuhake i te ao e ai ki te whakapae o te kaiako o te kapa tāne, ki a Clark Laidlaw.

Ka kore tonu ngā kapa e rua nei e mākona i ngā mētara Hoawhenua, ka mutu he timatanga noa iho. Hei tā Laidlaw anō, ko te tino whāinga ko ngā whakataetae Orimipia ki Tokyo hei te tau 2020.

Ko tā Niall Williams o te kapa wāhine, he āhuatanga pai te noho tahi o ngā kapa e rua. Ka hihiko te wairua o ia kapa nō ngā mahi o ia kapa. He mea mīharo kua riro i ngā kapa ngā mētara kōura.

Ka huri te aro inaianei ki te toenga o te whakataetae IRB, timata ana ki Hāpani hei te mutunga wiki nei mō ngā wāhine, ki Hingapoa mō ngā tāne hei tērā atu o ngā mutunga wiki. Ka mutu, ka tū te Whakatetae Ipu o te Ao Takiwhitu ki San Francisco hei te Hōngongoi e haere mai nei.