Kaupapa: Touch Rugby

Rite pai ana ngā kapa pā-whutupōro rangatahi Māori ā-motu ki te tuki hoariri

Kua rite pai ētahi kapa pā-whutupōro rangatahi Māori ā-motu e rua, ki te kaikapua atu ki te Pāpaka a Māui, ki Ahitereiria, ki reira tuki atu ai ki a Ngāi Māori mā o reira. 

He tuatahitanga hoki tēnei mā tētahi kapa pā-whutupōro Māori ā-motu kia ahu atu ki tāwāhi whakataetae ai.

Kua huri te marae o Unitec hei kāinga rua mā ngā kapa Māori e rua nei, i mua tonu i tā rātou wehenga ki Ahitereiria āpōpō.

Ko te whakapae, ka eke te paemahana ki ngā toru tekau ki Ahitereiria, nā reira e haere tōtika ana ngā kapa ki te papatākaro, kia whakaheke werawera ai i raro i ngā hīhī o Tamanuiterā.

Ko tētahi o te tira haere, he kapa tāne i raro i te rua tekau tau, ā, ko te kapa Māori tuarua ko te kapa hanumi i raro i te tekau mā ono tau.

Ka mutu, haunga rā ngā tohu huarere, mōhio pū ana rātou, he ihu manea te katoa o tō rātou hoariri.

Ahakoa e eke ana ngā kapa ki runga i te papatākaro, he whakapātari nui mā ngā kaitākaro me ngā kaiwhakahaere te kohi ake i ngā pūtea mō te haerenga.

Kātahi ka tīmata te tino whakataetae mā ēnei taiohi.