Ngā Whakataetae Waka Ama-ā-motu

  • Waikato/Te Waiariki

Ahakoa te ua, i tutuki pai ngā mahi o te rā tuatahi, tērā pea ka uaua mā ngā pipi paopao te hoe, engari i eke panuku tonu ana rātou, me te mea anō, kāhore i roa i whiti mai anō a Tama-nui-te-rā i runga i ngā kaihoe.

Neke atu i te 2,500 ngā kaihoe i whakarauika atu ki te whakataetae i tēnei tau mai ngā pipi paopao tae noa ki ngā kaumātua, nō ngā karapu 55 o Aotearoa.  Ko te whai a te katoa kō tētahi mētara mai te whakataetae nui rawa o te motu.

Ko te aronga nui o te rā tuatahi o ngā whakataetae ko ngā tamariki me te hunga rangatahi i raro iho i te 16 tau. 68 nga rēhi i whakahaerehia i te rā tuatahi, e toru ngā wāhanga, ko ngā pipi paopao, ngā takawaenga me ngā tira J16. I tutuki hoki ētahi o ngā whiringa toa i te rā tuatahi, hei te rā tuarua te nuinga o ngā whiringa whakamutunga whakahaerehia ai.

Ko tētahi o ngā tira kaha kua hau atu i tēnei tau ko te Karapu Waka Ama o Tūrangawaewae, engari kua karangahia, ko rātou tonu tētahi o ngā tino karapu toa i ngā wāhanga tamariki, rangatahi i ngā whakataetae ā motu ahakoa e waru tau noa iho te pakeke o te karapu rā.

Ko rātou tonu tētahi o ngā tino karapu toa i ngā wāhanga rangatahi i ngā tau e rua kua pahure ake nei, ko te tino hiahia kia ōrite tā rātou tū i tēnei tau. Ko tētahi o ngā wāhanga o taua karapu ko te tira Te Mata o Te Enua, i eke panuku ai rātou i tā rātou rēhi tuatahi. I pērā tonu te hua ki tā rātou kapa kōhine takawaenga, ki a Pare Hauraki. I eke panuku hoki rātou i tā rātou rēhi tuatahi.

I tīmata mai te Karapu Waka Ama o Tūrangawaewae i te tau 2005, nā te kaha o ngā mātua ki te akiaki i ngā tamariki ki tēnei momo hākinakina.

Kairīpoata: Rewa Harriman.