Ngā kaupapa: Fitness, Health

Ngā whakataetae maitā mo Te Ika a Māui ki Rotorua

Mere McLean
  • Waikato/Te Waiariki

Ko Daniel French he uri nō Ngāpuhi engari kei Ōtākou e tākaro ana i te hākinakina maitā, koia tētahi kua noho hei kanohi mo Aotearoa ki roto i tēnei hākinakina, ā, i tae ki ngā whakataetae maitā o Te Ika a Māui ki Rotorua i ēnei rangi okioki.

I toa tōna tīma takiwha ki tēnei whakataetae, ā, e whakarite ana rātou mo te whakataetae ā motu hei tērā wiki. Ki tā Kirstyn Harrison he tākaro tēnei ka whai wāhi ki te hunga mātāpūputu, mātātahi hoki. “Ahakoa nō hea? Ahakoa ko wai? Ahakoa to pakeke? I te mutunga o te rā kei te tākaro kē koe i te wā kotahi, āe, inā i a koe ngā pūkenga āe, ā, kia kite ake kei te ako tonu koe, āe, he pai”. Koinei tētahi o ngā whakataetae o te tau e kite nei i ngā kaitākaro whakaihu waka nō Aotearoa.

Ki tā Delwyn Hughes kaiwhakahaere, “inanahi nei, i tae mai tētahi tima nō Ōtākou, ā, i toa i a rātou te wāhanga takiwha ko Daniel French te kaiurungi, ā, he kanohi ia nō Aotearoa ko Keri Te Tamaki hoki tētahi o ngā mema kei runga i tōna tima, he kaitākaro ia ō mua mo Te Moana a Toi engari kātahi anō ia kia hūku ki Ōtākou i tēnei tau nō reira he pai te kite i a ia”. Mo Keri Te Tamaki tētahi o ngā mema o tērā tima “he mea mīharo kua riro ki ahau taku taitara tuatahi he uaua i timata ngā mahi i te 8:30 i te ata, ā, ka mutu i te 10:30 i te pō nō reira he rā tino roa engari he pai”. Ki tā Daniel French mātanga nō Aotearoa me aro tahi koe i te wā e tākaro ana koe.

“He nui ngā wā ka tākaro mātou i te kainga, e rua, toru pea ngā wā i roto i te wiki”. Kotahi rau, rua tekau ngā kaitākaro takirua i tākaro i te Rāhoroi, rima tekau mā rima ngā kaitākaro takiwha i tākaro inanahi nei, ā, i tēnei rā ono tekau mā rima ngā kaitākaro takitoru, ko te aronga mo tēnei hunga inaianei ki te whakataetae ā motu. “He mea pai ngā whakataetae ā motu, he wiki pai, me kaha ake na te mea ko ngā tino toa o te motu kei tērā huinga, ā, kei te mōhio mātou kia mātou he wā pai ki te whakawhanunga” ki tā Te Tamaki. Ka tū ngā whakataetae ā motu mo te wā tuatahi ki Hakatere hei te wiki e tū mai nei.