Ngā Toa Whakaihuwaka Māori i Āmerika

James Perry

E tere ripo ana ēnei tokotoru i te Whare Wānanga o Lindenwood i Amerika. He Whare wānanga e mōhiotia whānuitia ana i taua whenua mo ngā mahi whutupōro.

He rite tonu te ekenga ki angitu o Kodi Barlow, rātou ko Sativa Tarau-Peehikuru ko Malia Hemehema i ngā whakataetae whutupōro takiwhitu, tekau mā waru anō hoki.

Kei te keokeonga te kapa e kīia nei ko ngā Lions, ā, ko rātou ngā toa whakaihuwaka o te motu o Āmerika whai muri atu i tō rātou haukerekere i a Life University 36-8 i te whiringa toa i Karapōnia.

Kāore i roa i muri atu ka kapo e rātou te whakataetae ā motu takiwhitu i Colorado, ka mutu i piki anō rātou ki te taumata i te whakataetae Whare Wānanga takiwhitu. Ko te marurenga i ngā whiringa toa e rua ko te whare wānanga o Pennsylvania State.

Hei tā te uri o Ngāti Tuwharetoa, hei tā Barlow, e wehi ana ia kua kapohia e ia i ngā whakataetae e toru, e kīia nei ko te Triple Crown i tōna tau tuatahi. 

Ahakoa kāore rātou i tino mōhio ki ā rātou anō i mua i te taenga atu ki Lindenwood University, kua roa rātou katoa e whai ana i ngā moemoea Mamaku.

I timata tahi a Barlow me Hemehema ki Lindenwood, kua ono marama raua e noho ana ki St Charles, Missouri. Kua kotahi tau a Tarau-Peehikuru i reira. 

I tipu tahi a Hemehema me Tarau-Peehikuru ki Awaroa, i te whanga o Kaipara. I kuraina a Barlow ki Pakuranga. Ahakoa kāore ia i tino mōhio ki ērā atu, kāore i roa ka hoki mahara ki ngā hui whakangūngū i te wā kainga. Hei tā Barlow, i uru katoa rātou ki te hōtaka 'Go for Gold' e whakarite ana i Ngā Mamaku ō āpōpō.

He parirau rāua tahi, heoi i whakaingoatia tonutia a Barlow me Tarau-Peehikuru ki te kapa o te whakataetae, arā ki te Dream Team takiwhitu.

Ahakoa ka kore pea ia e eke ki ngā kapa Mamaku i tēnei wā, nōnā i Āmerika, kua roa ia e hiahia ana kia riro karahipi ki tētahi whare wānanga i Āmerika. Mō te toenga, he whai wāhi noa ki te takaro ki wāhi kē atu.

E whai ana a Barlow i ngā mahi roia, hei tāna e whakamahi ana ia i ngā momo hangarau kia kitea tonutia ia e ngā kaiako i Aotearoa, hei tāna anō e whai katoa ana rātou i a ia ki runga i ngā pae pāpori.

Kua riro katoa rātou i ētahi karahipi e utu ana i ngā nama ki Lindenwood. E aru ana a Hemehema i ngā mahi pākihi, hei tā te poutaha he taikaha ngā āhuatanga o aua karahipi. Me tae rātou ki ngā karaehe, ka mutu me eke ngā māka ā akoranga i te 2.5 GPA.

Kāore pea ngā kōhine nei kia tau i ngā wāheke, heoi, e ngana ana rātou kia whakarite i ngā ara katoa. 

Kua whai wā whakatā rātou i te kainga nei, hei ngā wiki tata nei hoki anō rātou ki te māeke i Missouri, me ngā manako nui kia pupuri anō ki te Triple Crown, ā haere ake nei.