Kaupapa: Basketball

Ngā toa NBL 2018, Southland Sharks

Te Kāea
  • Te Waipounamu

Ko te kapa Southland Sharks hai whakaihu waka mō te whakataetae poitūkohu ā-motu.  

I hinga i te kapa Sharks ngā kaingākau o te whakataetae arā te kapa Wellington Saints, e 98 ki te 96 kia riro i a rātau tō rātau taitara tuatoru.  Ko te kāpene, ko Reuben Te Rangi i arahi i tana kapa me ana piro e 26.

I mua te kapa Sharks e haere ana mō te nuinga o te kēmu, heoi, kāre te kapa Saints i mate wheke, i pakanga kia toru piro noa iho te tawhiti i te kapa Sharks i te miniti whakamutunga o te kēmu.  Ngana ai te tautōhito, a Leon Henry ki te whakaputa i ō rātau ihu ki te whaiao, heoi, auare ake i te korenga ōna i piro.  

Ko Shaun Bryce hoki i ngana ki te whakaū heoi pau ana te wā, poto hoki ana te whiu.  

Hei āpiti atu ki te wikitōria, ko Te Rangi hoki tērā kei runga mō te taha ki ngā piro maha rawa o te kēmu.