Kaupapa: Rugby

Nā te haka i whakatau ai ngā kaitākaro a te kapa Ōpango ki Whakatāne

Mere McLean
  • Tāmaki Makaurau

E pātata mai ana te Ipu Whutupōro o te Ao, ā, ko Whakatāne i rongo i te reka o te tūtaki atu ki nga Ō Pango ki a Liam Messam, Sam Cane rātou ko Tawera Kerr-Barlow.

Ko Whakatāne tētahi o ngā taone i toa i tētahi whakataetae Ōpango ki te motu e taea e ngāi wēhi ki te whakapiri atu ki ō rātou iho pūmanawa Ōpango.

Tūkaha te rohe o Te Moana a Toi ki te whutupōro.  E koa ana ngā kaitautoko nā te taenga mai o te kapa Ōpango, a Liam Messam, Sam Cane me Tawera Kerr Barlow ki te rohe.   

E ai ki a Pouroto Ngaropo, “He taone nui te kaha, nui te tautoko i a mātou.  Nō reira i tēnei rā, kua tae mai rātou i tēnei rā, kua puta ngā hua, kia mōhio mai te tīma Ōpango ko te rohe whānui o Whakatāne, Mātaatua waka kei muri i a rātou e tautoko ana.” 

Nā te haka i whakatau ai ngā kaitākaro whutupōro tokotoru ki te hau kāinga.

Ko te hīkoi a te kapa Ōpango i te motu te waka kawe i tēnei kaupapa, e whai wāhi ai ngā kai-tākaro ki te haere ki ngā taone, kura me ngā karapū i mua i ta rātou wehenga atu ki te ipu whutupōro o te ao.  Nā tēnei kaupapa whai wāhi ai ngā kaitautoko ki te whakaatu i o rātou aroha.

E ai ki a Maddison Himiora-Jones, “Kia kaha a Aotearoa ki te tautoko me te manaaki i tō mātou tīma.”

Ki tā Miriama Himiona, “He rahi tōku whānau ki te purei whutupōro me te manāki i ngā All Blacks ki te tautoko ana."

Ko ngā kura, kei ngā hapori Māori pēnei i Te Teko me Ruatoki i whakaatu i tō rātou manawanui mō tēnei hākinakina, he mea nui mō ngā tauira kia kite i ngā kaitākaro rawe ki a rātou.

Hei tā Pou Temara, “He pai te whutupōro i te mea, he mea kiko, he mea whakaatu i te kaha o te manawa.”

Ka haere tonu ngā kaitākaro ki Ōpōtiki i tēnei ahiahi i reira tūtaki ai ki tētahi atu huihuinga tāngata.