Kaupapa: Commonwealth Games

Mixed day on the Gold Coast

  • Ahitereiria

Ki te rā tuawaru o te whakataetae, tokomaha ngā kaipara i whakataetae i te rangi nei, tokomaha hoki ngā piki me ngā heke. 

Ko te tokorua poipātu tāne, ko Evan Williams rāua ko Lance Beddoes i eke ki ngā whiringa whānui o te whakataetae i tō rātou wikitōria ki a St vincent and the Grenadines, e 2-0. 

Ki te taha ki ngā kapa hanumi, kua koke whakamua a Joelle King rāua ko Paul Coll ki te whiringa whānui whai muri i tō rāua wikitōria ki a Barbados, 2-0. Engari i hinga te kapa tuarua, a Amanda Landers Murphy rāua ko Zac Millar ki a Īnia 1-2.

Nō te Rātū kua hōri i hinga a Shannon McIlroy kia Robert Paxton. I te ata tonu nei i tuki anō rāua i te whiringa whānui tāne takitahi pīrori maitā. I mua te ihu o McIlroy i te timatanga o te tukinga, engari nā wai rā i hoki mai a Paxton ā kāore i roa i mua rā anō a Paxton 17-9. Ahakoa i hoki mai a McIlroy kia 1 noa iho te tauwehenga, i ūpoko pakaru tonu a Paxton kia toa ia 21-16. 

Kua hoki atu a Kahurangi Valerie Adams ki te Taumāhekeheke Hoawhenua e 6 marama whai muri i te whānautanga mai ō tāna tamahine, o Kimoana. Kāore ia mō te ānewanewa, kōtahi noa iho tāna whiu matā i te whiringa taumātakitahi 18.52m te roa. Nā whai anō kua eke ia ki tāna whiringa whāiti tuarima, o roto i ngā Taumāhekeheke e rima, ka mutu e aru tonu ana i tāna mētara koura tuawha.

Hei te pō nei whakataetae ētahi kaipara o Aotearoa mō ngā mētara, e piki pea a Aotearoa i te ripanga mētara.