Me whakaharatau te kapa Breakers ka tika

Ahakoa kua whā karapīpiti ngā hinganga a te kapa Breakers i ngā tukinga parawhakawai inātata nei, ia tākaro, ia tākaro, ka pakari ake ai. 

Ā, he whakaharatau i te hau kāinga te mahi i tēnei wiki i mua i tētahi huinga tākaro e toru ki te tira Dongguan Leopards nō Haina.

Ehara i te tīmatanga pai mō te kapa Breakers, kua turakina rātou i ngā tukinga parawhakawai e whā, engari kāore e kore ka whakamatuatia te waka e te kapa whakaihuwaka nei.

Ā, i kitea ake tētahi whakangungu pakeke i te rā nei, me te aha, i arotahi hoki te kapa nei ki ngā ture kaiwawao hōu i hara nui ai rātou i te tōnamana parawhakawai i Poihākena.

Ināianei, ka aro atu ngā Breakers ki tētahi huinga tākaro e toru ki te tira Dongguan Leopards nō Haina, he tira e ākona ana e te kaiako matua ō-mua o te kapa o Ahitereiria, e Brian Goorjian.

He ōrite te tākaro tere me ngā mahi ārai a ngā kaitākaro nō Haina ki tō ngā kaiwawao o te ANBL e hiahia ana, nā wai rā, ka whai hua ngā Breakers i ngā tākaro ki ngā Leopards.

Hei tēnei Rātapu tū ai te tākaro tuatahi ki ngā Leopards ki Ngāmotu.