Me toa te kapa Warriors kia whai wāhi ki ngā whiringa whānui

Rahia Timutimu

E mauri tau ana te kapa Vodafone Warriors i mua i tā rātou tukinga ki te kapa Gold Coast Titans i te pā o Rarotonga ā te Rāhoroi.

Ki te hiahia eke ai rātou ki waenga i ngā kapa toa e waru o te whakataetae NRL, me toa i a rātou ngā tukinga e rua kei mua i te aroaro, ā mā te hinga pēhea mai hoki o ngā kapa ō-runga o te tēpu whakataetae e tohu.

Ko te anga whakamua te mahi a te kapa Warriors i tēnei wiki, e whakareri ana mō te tukinga o te rauna rua tekau mā rima ki te kapa Gold Coast Titans.

Whai muri tā rātou hinganga nui rawa atu o te tau, he whā tekau mā ono ki te tekau mā rua ngā tatau ki te kapa Sydney Roosters, e tino whakapono ana te kapa kei te huarahi tika rātou e haere ana.

E ngākau rorotu ana te kapa kei te tūranga tekau i te tēpu whakataetae NRL, e rua piro noaiho rātou kei muri i ngā kapa toa e waru, ā, e hiahia ana rātou kia turaki te kapa Dragons i te kapa Broncos apōpō kia noho tonu ai ngā Warriors ki te whakataetae

He whakanui tā te kapa i te rā nei, me te aha, ko te huritau rua tekau mā waru o kāpene Simon Mannering anō i te rangi nei, ā, kotahi noaiho tana hiahia, kia eke ki ngā kapa toa e waru i tēnei tau.

E whara ana ētahi o ngā Titans, ā, kāre e taea e rātou te eke ki ngā kapa toa e waru i tēnei tau, nā reira ka tūpono uru pea ngā Warriors kia eke ki tā Simon e hiahia nei.