Mā wai ngā pūtu o Taumalolo e whakakii?

E 3 ngā tukinga whakangungu e toe ana mā te kaiako Chiefs, a Dave Rennie, kia tohua he poumua hei whakakapi i te ngarohanga o Sona Taumalolo, te toki no Tonga kua riro ki Wīwī, tākaro whutupōro ai i tēnei tau.

Taihoa e pōhēhē, ka uaua te kimi whetū maiangi anō.

He tokotoru e mātua tirohia ana, ā, katoa o rātou e hiakai ana.    

Ko wai o ēnei hautipua ka whakakii i te tūranga poumua, kua mahue mai i a Sona Taumalolo.

Tokotoru ngā waewae tapu ki te rārangi poumua o te kapa, a, hei tā Ben Afeaki, i te rironga o Taumalolo, he tūranga kua wātea ki tētahi o rātou.

Ko Michael Kainga - he 21 tau tōna pakeke, ko Solomona Sakalia - i ahu mai i Pōneke, rātou ko Pauliasi Manu - he kaitākaro ō mua o te kapa Blues, e whai angitū ana i tēnei tau.

Ko rātou katoa e hīkaka ana ki te whakakii i ngā pūtu o Taumalolo, heoi me mataara.

He tino toki a Taumalolo i tērā tau, e 8 katoa āna piro i te tau kotahi i te taumata Super Rugby.

Ko Toby Smith anō tētahi o ngā tino poumua o te kapa, ko te kōrero ka uru tōtika atu ia ki te tira whakaeke, a ko Ben Tameifuna anō tētahi kei te kimi turanga.

Kairīpoata:  Tamati Tiananga