Kua wikitōria ngā Rarauhe Hiriwa i te hui Tri-Series

I tukuna a Maria Tuta'ia rāua ko Irene Van Dyk e Waimarama Taumaunu kia whakatā, kia whai wāhi ai te tokorua kaikuru a Jodi Brown raua ko Catherine Latu ki runga i te papatākaro.

Heoi anō, i pai ake te tīmatanga mai a Ingarangi i tā ngā Rarauhe Hiriwa, i tā rātou ekenga atu ki te kaute he ngāhuru mā toru ki te iwa i te mutunga o te hauwhā tuatahi.

Haunga rā tērā whakaaro o nga kaiwhakapāho, mau tonu ai ngā kaikuru, engari i takakawe tonu te kapa o Aotearoa ki te kōkiri whakamua he rua tekau mā toru ki te rua tekau te kaute i te wehengarua.

Ā, i mau tonu tērā kounga i a Aotearoa i te hauwhā tuatoru, kia whānui ake ai te āputa, toru tekau mā iwa ki te rua tekau mā waru ngā tatau.

Ahakoa te nui o te āputa, hiakai tonu nga Rarauhe Hiriwa kia rangatira ngā mahi i te hauwhā whakamutunga, ā, he tekau mā whitu piro anō i tāpiritia kia angitū ai rātou he whā tekau mā iwa, ki te toru tekau mā rua.

Ka whawhai atu te kapa ki te tima tuarua o Ingarangi āpōpō hei whakakōpani ake i tā rātou haere ki tāwahi.