Kaupapa: Rugby

Kua wikitoria ngā Ōpango Māori te tākaro tuatahi

Kua patua a Kanata e te kapa Ōpango Māori I ta rātou whakamātautau tuatahi i ta rātou haerēre ki Amerika ki te raki.

I reira tonu ta mātou karere hākinakina a Rewa Harriman, a kei te puku o te taone nui o Toronto ia I tēnei wa.

Ko tāna harikoa ana te tira ina ra kua tutuki te whāinga, he wāhanga tonu hei whakatika mā rātou, engari ko te mea nui, hei tāna, kua wikitoria.

Kahore a Piri Weepu i takaro, a i whara hoki a Hika Elliot, i te kemu tuatahi.

I korero tā mātou kaikawe kōrero ki te takuta o te kapa, a kua raru te tuara o Hika, ka mutu tērā pea ka tukuna ia ki te kāinga. Mo te taha ki a Piri, i raru tōna turi i te whakaharatau whakamutunga inanahi, na reira i te rangi nei whakatauria ai ka kore ia e takaro, ka mutu koia hoki pea ka whakahokia ki te kainga, hei apopo puta ai te whakatau a ngā kaiako.

Heoi i te mutunga ake kua tutuki nga mahi i te kapa Māori a he whakatutukinga moemoea hoki tenei ki te poumua hou, ki a Kane Hames

E mamae katoa ana nga tinana na te kaha tukituki o te kēmu ki te hoariri pakari.

Ahakoa te wikitoria, kua kitea ngā wāhanga hei whakatika mo te wiki e heke mai nei.

Heoi mo te roanga ake o tenei rā, me te rā apopo, ko te aronga nui ko te whakaora i te tinana me te ahu atu ki Philadelphia mo te wiki tuarua o tēnei haere. He whā tekau ki te tekau mā rima ngā piro whakamutunga.