Kua whakamātuatia te wikitoria a ngā Warriors e te whaina mākū

NZ Warriors win over Brisbane Broncos

Tekau katoa ngā piro a te kapa Warriors i tā rātou haukerekeretanga i ngā Broncos i Piripane inapō.

Ko ngā tatauranga whakamutunga, e rima tekau mā ono ki te tekau mā waru.

Heoi, i whakamātuatia te wikitoria e tētahi whaina, he tekau mā rima mano tāra te nui, nā te mimi a Russell Packer ki runga i te papa tākaro, i mua i te tīmatatanga o te tukinga.

Ehara i te tīmatanga e hiahiatia ana e te rōpū NRL.

Heoi, i tīmata tika ngā mahi tākaro i a Manu Vatuvei i tana whakawhitinga i te rārangi piro i te mēneti tuawha.

Nā te whakatika i ngā mahi i puta ake te toahanga karapīpiti tuatahi o te tau mā te kapa Warriors.

Tuia atu ki te wikitoria, he piro huarua i whiwhi ai ki ngā kaitākaro e wha o te kapa Warriors.

Ā, nā Thomas Leuluai te piro huarua tuatahi i riro i te mēneti toru tekau mā ono o te tukinga.

Nā Manu Vatuvei anō ngā piro i tīmata i te haurua tuarua, e whitu tekau mā toru mita tana omanga kia whai piro ai ia mō te wā tuawaru i tēnei tau tākaro.

Koinei hoki te wikitoria tuatahi ki tāwāhi a ngā Warriors mai i te marama o Hōngongoi i tērā tau i te tūrakitanga o te tira Titans.

Ā, ko te piri ki ngā mahere tākaro te take i toa ai te kapa, me te whiwhinga i ngā piro tekau.

Inaianei kei te tūranga tekau mā wha o te arawhata whakataetae te kapa Warriors e noho ana, e wha tatau noa iho i waho atu i te kahui kapa e waru.