Kua whakaingoa te kapa Tāroaroa Pango mō ngā whiringa whakauru

James Perry

Kua whakaingoatia e Paul Henare tōna kapa Tāroaroa Pango ka tuki ki a Hīria me Reponona hei ngā wiki tata nei.

Kua riro anō mā Mika Vukona te kapa e arahi. Ka whai wāhi ngā uri Māori pēnei ia Reuben Te Rangi, rātou ko Tohi Milner-Smith ko Jordan Ngātai ko She Ili anō ki te kapa. Hei tā Henare kua hanumi anō ngā tuakana me ngā teina.

Kua whara a Tom Abercrombie, kua whakatā hoki a Corey Webster. Hei tā Henare, ka pai ake mēnā e āhei ana te tokorua rā ki te tākaro heoi me koke whakamua tonu te kapa.

Nā ngā korenga rā kua whai wāhi ētahi atu e noho ana ki te pae hihiri. Pēnei ki ngā kaitākaro Bay Hawks, ki a Ethan Rusbatch me Dion Prewster. Ehara i te mea he tore kaihuruhuru rāua ki te kapa, e matapae ana a Henare ka nui ake ā rāua mineti tākaro. 

I poho kererū a Henare i a Rusbatch i ōna pūkenga ārahi, ka mutu i ōna pūkenga kuru anō hoki i Haina mā te kapa New Zealand Select.

Kotahi noa iho ngā hingatanga o te kapa i ēnei whiringa whakauru ki te Ipu o te Ao, arā te kēmu tuatahi kia Kōrea i te Whiringa a Rangi o tērā tau. Kua rima ngā wikitōria karapīpiti o te kapa i tēnei wā.

Heoi, nō te nui o te rohe o Āhia ka raru tonu pea rātou i te roa o ngā haerenga. Hei te 14 o Mahuru (NZT) tuki ai rātou ki a Hīria i Reponona, katahi ka piki pereina mō ngā haora 36 i mua i te tukinga ki a Reponona i Rotorua hei te 17 o Mahuru.

Hei te Rāhina wehe ai te kapa Tāroaroa Pango ki Qatar whakarite ai mō te tukinga tuatahi ki a Hīria i Reponona. Mā Whakaata Māori te kēmu e pāoho mataora atu ā ipurangi. Ka pāoho mataora ā pouaka whakaata anō hoki te kemu atu i Rotorua hei te Rātapu ka whai ake.

Te Kapa tāroaroa:

Kaiārai: Shea Ili, (SKYCITY Breakers) Jarrod Kenny, (Cairns Taipans) Ethan Rusbatch, (Bay Hawks) Tai Webster, (Galatasaray (Turkey))

Poumua: Reuben Te Rangi, (Brisbane Bullets), Dion Prewster, (Bay Hawks), Jordan Ngatai, (SKYCITY Breakers), Isaac Fotu, (Ratiopharm Ulm (Germany)) Finn Delany, (SKYCITY Breakers), Mika Vukona, (Brisbane Bullets)

Pouwaenganui: Rob Loe, (Cairns Taipans) Tohi Smith-Milner, (Melbourne United)