Kaupapa: Rugby

Kua whakahōnore ngā kaitākaro Māori i te Pō Tohu Tākaro Whutupōro

Tokowhā ngā uri Māori i kapo ake i ngā tohu toa o te Pō Tohu Tākaro Whutupōro o Aotearoa i tū ki Tāmaki Makaurau inapō.

Kātahi te tau autaia ko tēnei mā Liam Messam, i whai wāhanga atu ia ki te toahanga matatira tuarua o te taitara Super 15 a te kapa Chiefs, ā, i hinga-kore hoki ia te poutaha nei me te kapa Ōpango, nā whai anō tāna tohutanga ki te tohu Kaitākaro Māori o Te Tau.

Ā, pērā tō Liam tau, tōnui ana tērā kua pahemo nei mā te uri o Ngāpuhi a Portia Woodman. Nāna i awhi i ōna tuākana takiwhitu kia wikitoria i te whakataetae takiwhitu me te Ipu Takiwhitu o Te Ao i Moscow. Tekau mā rua āna pironga i taua whakataetae, nā konā ka riro i a ia te tohu Kaitākaro Takiwhitu Wahine o Te Tau.

Ki te Tāne Takiwhitu o Te Tau, uaua ana mā ngā kaiwhakawā te whiriwhiri ko wai o Kurt Baker, Gilles Kākā, Tim Mikkleson rānei me tohu. Ā pēra i ngā wāhine takiwhitu, i wikitoria i ngā tāne te whakataetae takiwhitu me te Ipu o Te Ao, heoi i te mutunga iho ko Kurt Baker tērā i toitū.

Ko tētahi o ngā tohu hou ko te Piro Papai o Te Tau ki tā ngā i kaiwhaiwhai kite ai, ā, ahakoa he tino whakataetae tēnei, ko te piro a te Mamaku Pango a Selica Winiata i te otinga o te whakamātautau tuatoru ki a Ingarangi, i ngakaunuitia e ngā kaiwhaiwhai.

Ka mutu, i tohua ko nga Ōpango ko te kapa o te tau, ko te kaiako Ōpango a Steve Hansen ko te kaiako o te tau, ā, ko te tino tohu o te po i riro i te nama waru o nga Ōpango a Kieren Reid, arā te tohu o te Kaitākaro Whutupōro o Te Tau.