Kua whai oranga anō te kapa Breakers ki te whakataetae ANBL

I mohio kē ngā Breakers he kemu pai tū pai hinga tēnei, ko ngā tukinga e rima e toe ake nei me toa.

Heoi, ko te kapa Crocs te kapa morearea i te timatanga, kokiri whakamua ana ki te kupenga, arahi ai te tukinga i te whakata tuatahi.

Ahakoa i eke te kounga o te hoariri, na ngā pukenga koi o Tom Abercrombie i whakatata atu ai ngā Breakers, engari i muri tonu rātou ma ngā maka e rima i te wehenga rua.

He awhina nui hoki ngā wheako o CJ Bruton i tana tau takaro whakamutunga mō te karapu, koia hoki te kaitakaro tuarua noa kua eke ki ngā maka rua mano mō ngā Breakers.

I te hauwha whakamutunga, i kitea te manawa o te kainga, he tekau ma toru ki toru ngā tatauranga ki ngā Breakers, me tētahi kuru toru na Abercrombie i puta ta rātou ihu ki mua.

I puritia tera aputa kia eke panuku ngā Breakers, kotahi rau ma rua ki te iwa tekau ma iwa, kia ora tonu ai hoki ta rātou whai ki ngā whiringa whanui.

He whakamatautau nui ma ngā Breakers ki Cairns apopo engari ki te wikitoria ano, ka tu a rātou tukinga e toru whakamutunga o te whakataetae ki te kainga me te tunga ki ngā whiringa whanui e tarewa tonu ana.