Kaupapa: Education

Kua whai ētahi kura o Te Moana a Toi i tō rātou hahau i tētahi kaupapa hahau pōro

Mere McLean

He tauira nō ngā kura o te rohe o Kūhawaea, Murupara me Te Urewera kua whai mana ki roto i te hahau pōro na runga i tētahi kaupapa i waihangahia e te whare hahau pōro o Murupara.

E toru tekau ngā tauira mai i ngā kura nō roto mai i ngā takiwā nei ka tae mai ki te papa hahau pōro o Murupara mō te rua haora, ia Rāmere, i ngā wā kaupeka kura e rua ki muri nei.  Ko te whāinga kia hākoakoa, kia ako hoki i te hākinakina hahau pōro. 

Ko tā William Apirana o Te Kura Kaupapa Motuhake o Tāwhiuau ako, "I te wā ka hahau koe, kia pai tō tū, ā, whakaarohia ko tēhea taha me patu rawa!"

Mō ia tauira he rua taara te utu ka haere ki te āwhina i te kaiako hahau pōro, i a Mike Campbell mō tana haerenga mai i Tauranga ki Murupara.

Ko Robert Eketone tētahi o ngā kaiwhakarite, he kaiako ia nō te kura o Te Whaiti nui a Toi.  E ai ki a ia, he nui ngā akoranga kua puta i te hahau pōro ki ngā tamariki.  Hei tāna, "Mai taku kura, ka hara mai ngā tauira nā te mea e hiahia ana rātou ki te tākaro hahau pōro, nā tērā kua hiahia rātou ki te hara mai ki te kura, ki te taha ako kua piki anō."

Ko te manako nui mai i te karapu hahau pōro o Murupara, mai i ngā kaiako, i ngā pakeke me ngā tauira, tērā ka ū tonu rātou ki tēnei hākinakina, ahakoa whakataetae mai, ahakoa mahi pārekareka mai rānei.