Kua wehi a Henare i ngā pūkenga rangatahi

James Perry

Kua oti ngā whakataetae poitūkohu rangatahi o te tau mō te tau nei. Hei tā te kaiako o ngā Tāroaroa Pango, hei tā Paul Henare, kua piki te kounga o ngā kaitākaro rangatahi nei.

Hei tā Henare, kāore anō ia kia tino whai wāhi ki te mātaki i ngā whakataetae rangatahi i roto i ngā tau tata nei, heoi kua tae atu ia ki ngā whakataetae U17, U15 anō hoki i roto i ngā wiki e rua kua tahā nei. Hei tāna, e ora rawa ana te poitūkohu i Aotearoa. 

Kua tino harikoa ia i te kounga o ngā pūkenga o ngā rangatahi nei.

Hei tā ngā tatauranga o te Kaunihera Hākinakina ā Kura, e matapae ana hei te tau rua mano rua tekau koia pea te hākinakina nui rawa o te motu i ngā kura. I te tau 2017, he neke atu i te 25,000 ngā tauira uta noa i te motu e takaro poitūkohu ana i te kura. Ko te Poitarawhiti me te Whutupōro noa iho ngā hākinakina nui ake. Hei tā Henare, e hia kē nei ngā take kei te pērā, heoi hei tāna ko te pouaka whakaata tētahi, ka mutu ko te pāoho ā matawā nei tētahi atu. E tere āhei ana ngā rangatahi, me ō rātou whānau te mātaki i ā rātou anō puta noa i te ao.

Kua kite anō e Henare i ngā hua o ngā mahi whakawhanake o Poitūkohu Aotearoa ki ngā rohe puta noa i te motu. I puta te ihu o Taranaki i te whakataetae kōtiro U17 i tērā wiki, ki tā Henare mōhio ai, koira te wā tuatahi kua angitu a Taranaki ki tētahi whakataetae rangatahi. E tautoko hoki ana ngā tūranga kua whakawhiwhia i te tau nei i tā Henare kōrero. Ko Waitaha, ko te Whanganui-a-Tara, ko Waikato, ko te Rakipaewhenua ētahi atu rohe kua eke ki ngā karamatamata o ngā momo whakataetae rangatahi nei.

Ko te manako nui mō Poitūkohu Aotearoa ka riro i ngā kapa o Aotearoa ngā hua o te whakapiki kounga nei.