Kaupapa: Rugby League

Kua waitohua e Issac Luke he kirimana kia hono atu ki te kapa Warriors

Rahia Timutimu

He waitohunga kirimana nui whakaharahara mā te kapa Warriors i te whakatau i te rā nei, hei te paunga o tēnei tau, hono atu ai te waetīkape Māori autaia nei, a Isaac Luke ki a rātou.

Koinei te tau whakamutunga ka kitea a Issac Luke i ngā kākāhu o te tira Rabbitohs, whai muri i tana haina kirimana ki te karapu NZ Warriors mō ngā tau e toru i te ata nei.

Kua whakaae te kaitākaro, he rua tekau mā whitu tau tōna pakeke, ki te wehe moata i ngā tau e rua e toe ana i tana kirimana ki ngā Rabbitohs, kia wātea ai te kaitākaro Kiwi te hono tahi atu ki ētahi o āna hoa tākaro Kiwi ki Rarotonga.

I roto i tētahi pānui na te karapu Warriors i tuku, hei tā Luke.

"Kua roa rawa au e noho tawhiti ana i te kāinga, ā, e kaimomotu ana taku āhua.  I rawe taku tākaro mā te tira Rabbitohs. Kua tino āwhina rātou i a au, heoi anō, kua roa au e kōingo ana te hoki ki Aotearoa, ā, e harikoa ana au kua whakaae rātou kia tukua ahau.

Ko te hoki ki te kāinga, tākaro tahi me te kapa Warriors tētahi o aku tino hiahia.  Kei te mōhio au ki te nuinga o ngā kaitākaro o reira, ā, kua kite au i ngā hua o ngā mahi a Jim nō tana tū whakahaere."

Ko Jim Doyle te kaiwhakahaere hou o te kapa Vodafone Warriors, kātahi anō ka tau ki te kainga mai i Poihākena i tēnei ahiahi.  Hei tāna koinei tētahi o ngā kirimana nunui i te hītori o te karapu.

Ka whai tēnei hainatanga i tēra mō te kaitākaro Kiwi, Sydney Rooster hoki a Roger Tuivasa-Sheck, he toru tau te roa o tana kirimana hei te otinga o tēnei tau tākaro.

Kua eke a Luke i ngā pūrongo pāpāho maha mō ngā mahi tinihanga.  Heoi e mōhio ana a Tony ki aia, whai muri i a rāua mahi tahi me te tira Kiwi, ā, he Luke anō kei te hoki mai ki te kāinga.

Kei te mōhio hoki a Tony, mā ngā hainatanga mīharo pēnei e nui ake ai te tautoko.