Ngā kaupapa: Māori Sports Awards, Rugby

Kua uru a Tyla Nathan-Wong ki te rārangi whāiti o te wāhanga o Te Tamāhine-a-Papatūānuku

Wikitōria Day

Kua uru anō te uri o Ngāpuhi a Tyla Nathan-Wong ki te rārangi whāiti o te wāhanga o Te Tamāhine-a-Papatūānuku i te pō tuku taonga hākinakina Māori.

Koinei te wāhanga e kitea mai ai te kaitākaro wāhine teina autaia o te tau. I kōrero a Te Kāea ki a ia mō te tini o ngā tutukitanga āna i roto i te tau kua hipa nei.

He rua tekau noa iho ōna tau, heoi, inā kē te nui o ngā mahi kua pahawa i a ia. I tērā tau i kapo ake ia i tēnei tohu tākaro, ā, i tēnei tau ka whakamihia anō ia.

Kua tū ia hei kaitākaro mā te kapa whutupōro wāhine takiwhitu o Aotearoa i riro i te taitara toa o te ao mō ngā tau e rua.

Ka kore āna mahi angitū e oti i reira. Kua uru ia ki te rārangi whāiti o te pō tuku taonga hākinakina o Waitakere mō te wāhanga kaitākaro autaia o te tau, te wāhanga tutukitanga Māori hoki.

Ahakoa kua eke te kapa wāhine o Aotearoa ki te keokeonga, e whakapono ana a Tyla, arā tonu ngā wāhanga o te tākaro e taea ana te whakawhanake.