Kaupapa: Health

Kua tūtukitia e Te Ururoa Flavell te taiwhainga Iron Māori haurua

Rahia Timutimu
  • Te Tai Rāwhiti

He tino rā te whitu o Hakihea mō te katoa o ēnei kaiwhakataetae, hēoi mō Te Ururoa Flavell, koinei ko te rā i uru tuatahi ai ia i te rēhi takitahi o te tauwhāinga rino haurua o Ironmāori, me te rā i eke ai ia i tōna tau rima tekau mā waru.

I te wāhanga tuatahi, te kau rua kiromita, i te taha tona whānau e tautoko ana i a ia.

Hei tā Flavell, “Pai tonu te kaihoe, pai ake nei taku i whakaaro ake nei.”

Oti ana te kauhoe i te whā tekau mā toru meneti, ka huri ki te eke pahikara me te awhina hoki i ētahi atu. Koinei pū te wahanga roa rawa, he iwa tekau kiromita te roa.

Heoi, mārakerake kitea ana tōna tau i te māmā noa o tāna kawe.  Mahue ana ētahi kaiwhakataetae ki muri, ā, kāre i roa ka eke ia ki te wehengarua, ka tahuri te ihu ki te kāinga.

E toru haora, toru tekau mā ono meneti ka oti i a ia te eke pahikaha.

Ka huri ki te oma i te rua tekau mā tahi ira tahi kiromita o te wāhanga whakamutunga.

Tē aro ko te mamae, upoko māro ana te karawhiu, ko tōna whānau e akiaki atu ana.

Hēoi nō tōna huringa whakamutunga, ka ururoa te oke, kia oti ai te rēhi.

Pau ana ngā hau, ka ū a Te Ururoa ki uta i te whitu haora, e rua tekau mā whitu meneti me te kotahi hēkona.

Ko tā Flavell anō, “He uaua, te mutunga mai o te uaua, kare au i whakaaro ake ka pera te uaua, engari i pai tonu, kua tutuki pai, kua harikoa, ki taku ra whānau na me kī kua whakakorengia i taku bucket list ināianei.”