Kaupapa: Boxing

Kua tūtaki atu te tokorua mekemeke nō Aotearoa i Easton Assassin

Tamati Tiananga

I te ahiahi nei i tūtaki atu a Rob Berridge rāua ko Joseph Parker ki tētahi toki mekemeke o te ao o mua nō te reanga taumaha rawa o Amerika. 

I pakeke mai te ika-a-whiro nei i te rohe o Easton, Pennsylvania, te wahi i puia ake ai ko tōna ingoa karanga, ko Easton Assassin.

Kua whāngaihia ngā mōhioranga o Larry Holmes ki te tokorua mekemeke nei. He āhuatanga e mīhia nei e te uri nō Ngāi Tahu rāua ko te māhuri tōtara o Hamoa, ara a Rob Berrige raua ko Joseph Parker.

Nō ngā kaiwhawhai anō te māringanui i kai tahi rātou i te whare hoko kai a Holmes, ko Champs Corner te ingoa.

Me te aha, e whai whakaaro nui ana a Holmes ki te tautoko i a Berridge me Parker i ā rāua whawhai ki te whare petipeti o Sands, Bethlehem, hei te ata o te Rātapu e ai ki te wā i Aotearoa.

Kua tukuna ano te karanga a ngā kaiwhakahaere o Duco ki a Holmes kia haere mai ki Aotearoa hei manuwhiri tuārangi mō te huinga whawhai Fight for Life hei te Hakihea.