Kua tohua a Winston Reid hei mangai hou mo Te Tarahiti Whana Poikiri o Aotearoa

Wepiha Te Kanawa
  • Tāmaki Makaurau

He rā whakamīharo tēnei mā Te Tarahiti Whana Poikiri o Aotearoa i te whakapuakitanga o Winston Reid nō Tainui me Te Rarawa, hei māngai hōu mō rātou.

He kōrero tēnei kua tau i mua i te tākaro a te kai-ārai nei o West Ham United ki te wā kāinga nei, ki Tāmaki Makaurau hei te pō nei.

Ko ia pea te toki hākinakina Māori rongonui rawa atu o te ao ki tāwāhi.

Ka tākaro tahi a Winston Reid ki ngā toa whana poikiri o Ingarangi, ā, ināianei ko ia te kanohi o te whana poikiri hei akiaki i te hunga Māori kia whai i te hākinakina nei.

E ai ki a Leo Bertos o te Kapa Mā Katoa, he ruarua noaiho te hunga Māori e whai ana i te whana poikiri, ā, e tūmanako ana ia mā Winston e whakatenatena te iwi Māori kia aro ki tēnei hākinakina.

Ko tēnei te wā tuatahi ka pōhiri a Aotearoa i ētahi kapa e rua o te taumata tiketike o Ingarangi, arā, i a West Ham United me Newcastle United, mō te haerenga Football United.

Ka tuki te kapa Phoenix o Pōneke ki te kapa West Ham ki te taiwhanga o Eden ā te pō nei.