Kaupapa: Rugby

Kua toa ngā wahine o Tāmaki i tā rātou kēmu whutupōro ki a Manawatū

Wikitōria Day

I tēnei te wiki tuawhitu o te tauwhāinga ITM mā ngā kaitākaro whutupōro wāhine, i tuki atu a Tāmaki Makaurau ki a Manawatu i Te Papaioea.  Ahakoa i pakanga te tira hau kāinga mō te hemo tonu atu, ko te hoariri, ko Tāmaki Makaurau tērā i puta toa mai.  He toru tekau mā iwa ki te waru ngā tatauranga whakamutunga.

I puta mārohirohi mai a Tāmaki Makaurau i te huatakitanga.  Kāre i kō atu i tō rātau rārangi kōkiri hei ārahi i a rātau ki te raina piro.  Ki reira whakawhiwhingia ai te piro tuatahi.

I pakanga tonu a Manawatū, heoi, i turakitia rātau e te rārangi kōkiri o Tāmaki Makaurau.  Nā konā ka riro mai i a rātau tā rātau pironga tuarua.

Kotahi mita noa te tawhiti a Manawatū ki tō rātau rārangi piro.  Ka whāngaihia atu te pōro ki a Crystal Mayes, kātahi ia ka whakatau i te pōro ki te papa.

Kāre i roa, ka hoki mai anō te kapa noho tāone nui.  Nā ā rātau mahi ohu i whakatata atu rātau ki te rārangi piro, nā wai, ka angitū a Kiritapu Demant.

I ngā hekona i mua mai i te wehengarua, ka whiwhi a Shannon Leota i tana piro tuarua.

I pērā anō te kōrero i te haurua tuarua.  I whakaoti i a Tāmaki Makaurau te kēmu me ngā pironga e toru.  He toru tekau mā iwa ki te waru te hua whakamutunga.

Hei tērā mutunga wiki kakari atu ai a Tāmaki ki a Ōtākou, ā, ka tū hoki ko Ōtākou hei hoariri mō Manawatū a te rua wiki.