Ngā kaupapa: Commonwealth Games, Netball

Kua timata te tōnamana poitarawhiti kura tuarua mo te tai whakararo

Mere McLean
  • Waikato/Te Waiariki

Kua piki te tokomaha o ngā kura Māori e uru ana ki te whakataetae poitarawhiti kura tuarua i te puku o te Ika heke whakararo. Neke atu i te toru tau a Ngā Taiātea Wharekura e uru ana ki tēnei huinga, ko ta rātou hiahia kia piki ake ngā kura Māori ki te huihuinga nei. Ko Ngā Taiātea Wharekura tētahi o ngā kura kotahi rau, rua tekau kei tēnei tōnamana. Ki tā Apakura Poutapu-Matenga o Ngā Taiātaea Wharekura “kua tae mai mātou i raro i te maru o Pou tu whakaaro koira to mātou oratanga, ko te Pono, te Tauutuutu, te aroha, te kawenga”. Koinei to rātou tūkinga tuarua tēnei, ko te kāreti o Te Aroha ngā hoariri. Hei tō Bridie Te Ahumairangi Potts tētahi atu o ngā tauira nō Ngā Taiātea Wharekura, “ka ū atu mātou katoa, ka whai piro rātou, ā, ka hoki piro atu mātou nō reira tino kaha te kēmu nei”. “Koira to mātou mahi ki konei, te whakatū i o mātou uaratanga mai te kura, nau mai ki ngā kōti, takaro i te netipōro, ka tutuki te kaupapa”. Koinei te rā tuatahi o te tōnamana, ki tā ngā kaiwhakarite he huinga kua tipu. Ki tō Lynette Brady tētahi o ngā kaiwhakahaere “tokowaru, tekau pea ngā kura Māori kei konei etahi o rātou kua whakarōpū ngā kura i a rātou i tēnei tau”. Ka mutu te tōnamana nei hei te Rāmere, tokoono ngā tīma mai te wāhanga A ka haere ki te whakataetae ā motu mo ngā kura tuarua ka tū hei te marama e haere ake nei.