Kaupapa: Rugby

Kua tīmata ngā whakangungu a te Kapa Blues me Benji Marshall

  • Tāmaki Makaurau

Koinei te tīmatanga o te huarahi mā te kapa Blues rua mano tekau mā whā, te rangi tuatahi o ngā whakaharatau tomua.

Ka mutu, kahore he hua i te kore mamae, nā reira ka whakamatauria ā-tinana, ā-hinengaro te kapa a ngā wiki e toru e hāere ake nei.

Hei tā te kaiwhakangungu a Wally Rifle, "Ko te kotahitanga o te kapa, te ārahitanga, te whakapakari i te kapa, ērā momo.  

Me te tutuki i ngā mahi nakawhiti kia ea ai aua whāinga e rua i mua i te Kirihimete."

I kī atu a Benji Marshall, i āmaimai ia i tana hui tuatahi hei kapa i te ata nei me te uru atu ki tēnei whakamātautau nakawhiti, heoi kua rite pai ai ia.

Ko te nuinga o te kapa i whai wāhi atu ki te whakaharatau tuatahi nei, engari anō ngā kaitākaro Ōpango, ngā toa Ōpango Māori hoki e whakangā tonu ana.

Ka mutu, harikoa ana ēnei kaitākaro Blues kua tīmata tā rātou tau tākaro hōu.

Ā, i hinga hāere te kapa Blues i te mutunga o tēnei tau takāro, nā reira me kore rawa e pērā anō hei te tau hōu.