Kaupapa: Rugby

Kua tae atu te Kapa Ōpango Māori ki Hapāna kia whakarite mo ā rātou whakamātautau e rua

Whai muri i te rua tekau haora, kua tae atu te Kapa Ōpango Māori ki Hapāna kia whakaritea ai mō ā rātou whakamātautau e rua ki te tira o Hapani.

Kātahi rā te haerenga roa, tekau mā tahi haora te rerenga tuatahi ki Hong Kong, ka whakawhiti ki rererangi kē ki Osaka, Hapāna oti ai.

Ā, he āhua whitu tekau kiromita mai i Kobe ki Osaka mā runga pahi, nā reira kei te hanga ngēngē ētahi, heoi ahakoa tēnā i whai wāhi atu ahau ki tā rātou huihuinga tikanga tuatahi inapō.

Nā te tokomaha o ngā tauhou i te kapa, kāore he wā hei āta ako mā ētahi ki ngā kupu me ngā mahi ā-ringa a ngā waiata me te haka.

I uru tuatahi a Joe Royal ki te Kapa Ōpango Māori i tērā tau, engari nā tōna matatau ki te haka i eke ai ia ki te aroaro i tēnei akomanga.

Ahakoa te whakahirahira o te whakaharatau ki runga papatākaro, e mōhio ana ngā kaiwhakahaere me ngā kaitākaro nā ēnei akomanga i rerekē āi tēnei o ngā kapa, e whai kaha hoki ai rātou ki runga i te papatākaro.

Heoi, mā te whakaharatau, ka rangatira ai te mahi.

Kei muri a Hapāna i a Aotearoa e whā haora.  He mahi anō tā te kapa hei te ahiahi nei.  Ka mutu ka tū tā rātou whakaharatau pau te kaha āpōpō.