Kaupapa: Rugby

Kua rite pai a Ngatai ki te ārahi i te kapa Ōpango Māori āpōpō

Kotahi noa te rangi e toe ana kia uru atu te kapa Ōpango Māori ki te mura o te ahi, me kī, ki te ana o te 'Tarakona' mō tā rātou whakamātautau tuatahi ki te tira o Hapāna. 

Kua reri a Charlie Ngatai, te kāpene hou, ki te ārahi i te kapa āpōpō.  Otirā, kua rite pai te kapa whānui kia tuki atu ki a Hapāna, me te mōhio anō ehara i te mea ko rātou anake e oma atu ana ki te papatākaro, ka kawea e rātou te hītori o te poraka, te mana o o rātou tupuna me te ao Māori ki runga i o rātou pokohiwi.

Rua tekau mano ngā tīkiti kua hokona mō te whakamātautau ki te pā o Nouveir, he nama nui tērā ki tēnei takiwā o te ao. 

Kahore e kore ka kitea ētahi uri Māori ki reira engari ko te nuinga o rātou he kaiwhaiwhai whutupōro hapani e ūmere ana mō te hau kāinga.

Me hoki atu ki te kura tuarua koinā te wā whakamutunga i ārahi ai a Charlie i tētahi kapa, engari he rerekē i tēnei wā.

He kaiārahi māhaki ia, he tangata whakamiha, ā, e mihi ana ia ki ana hoa tautōhito e tautoko ana i a ia hei hāpai i ngā mahi a te kāpene.

Nō te tau rua mano mā whitu uru atu ai a Hayden Triggs ki te kapa Ōpango Māori, engari nō te tau rua mano tekau te wā whakamutunga i whakamau ia i te poraka nei, hei tana, ahakoa tana ngarohanga mō te whā tau, kahore he rerekētanga.

He hua nui hoki ōna mātauranga o te whutupōro ki Hapāna, e toru tau tākaro ia e tākaro ana ki te karapu Honda ki Sizuka.

Heoi, ahakoa te maia o Hapāna, e whakapono ana te tira nei he kapa angitū tā rātou.