Kaupapa: Sevens

Kua rite Ngā Mamaku mō te tauwhainga whakamutunga mō te tau

Rahia Timutimu

Hei ēnei rangi whakatā tuki atu ai te kapa Mamaku ki ngā toa o te ao ki Parī, i te rauna whakamutunga o te whakataetae takiwhitu ā ao, me te aha ko te wikitōria karapīpiti te whai. Tokorua ngā kaitākaro hou kei tēnei kapa, tēnā i te kapa i tākaro i tērā marama, ko ngā uri Māori ko Gayle Broughton, rāua ko Shiray Kaka, nō te tau rua mano tekau mā ono tana whakataetae whakamutunga.

Kua tau atu Ngā Mamaku ki Wiwi, tōmua i te tauwhainga whakamutunga o te tau tākaro.

Kei muri tata a Aotearoa i a Ahitereiria mā te whā kaute i te tēpu whakataetae mō te tau, ka mutu, me mātua wikitōria te kapa o Aotearoa i ēnei rangi whakatā kia toa i te whakataetae katoa. Hei tā te kaiako hei tā Allan Bunting kua rite pai ai rātou mō te tauwhainga kei mua i te aroaro, engari he puna uaua tā rātou, ehara i te mahi māmā kia tae ki ngā whiringa toa.

Ko Shiray Kaka (nee Tane) tērā ka āwhina i tana kapa, kare anō te uri Māori nei kia tākaro mā tēnei kapa mō te rua tau. Ahakoa i haere tahi ia me te kapa ki ngā Taumāhekeheke Hoawhenua i tēnei tau, he kairīwhi noa tana mahi, kāore i eke ki te pātiki.

E ai ki a Kaka kua rerekē te taumata tākaro i tēnei wā, tēnā i tana wā whakamutunga tākaro ai ia i te tau rua mano tekau mā ono. He kakama ngā kōhine i tēnei wā, pukenga rau hoki a rātou.

Koinei te wā tuatahi tākaro ai ngā wāhine ki Wiwi, me te hiahia, he wikitōria te hua.