Kaupapa: Netball

Kua rewa te whiringa whāiti mō te whakataetae poitarawhiti ā-motu

Rahia Timutimu
  • Tāmaki Makaurau

Kua tae ki te wāhanga whakahirahira o te whakataetae poitarawhiti ā-motu ki Trusts Arena ki Te Uru o Tāmaki. 

Tekau mā whā ngā tira huri noa i Aotearoa i pakanga atu kia eke ki te puna e whā o runga.  I whai atu a Te Kāea i te whiringa whāiti tuatahi ki waenga i a Te Whanganui a Tara me Te Raki Paewhenua.

I patu Te Whanganui a Tara i ngā toa o tērā tau i a Otepoti inanahi kia eke ki tēnei whiringa whāiti, ā, i pakari anō rātou i te tīmatanga o tēnei tukinga.

Ahakoa to rātou maia i hoki kaha mai a Te Rakipaewhenua kia taurite ai ngā tatauranga tekau mā toru ki te tekau mā toru.

E rua e rua ngā kapa i te wāhanga tuarua engari i puta te ihu o te Raki Paewhenua, rua tekau mā ono ki te rua tekau mā whā.

I eke anō te taumata tākaro a te Raki Paewhenua i te hauwhā tuatoru, ā, taputapu ana a rātou mahi i te porowhita kuru.

I kawea tā rātou mauritoa ki te wāhanga whakamutunga, i patua te hoariri 61 ki te 48 kia eke ki te whiringa toa āpōpō.