Ngā kaupapa: Rugby, Rugby League

Kua rapua ngā taitama tāne e rua kia whakatatū ai o raua moemoea tākaro

Aroha Treacher

Koinei te wāhanga o te tau e toro ai ngā kaikimi pūkenga ki ngā tini tōpito o te motu, hei rapu haere i ngā kaitākaro whutupaoro, rīki rānei, e eke ana i ngā reanga, ā, ko te āhua nei, e hia kē ngā whetū o āpōpō kei te whenua nei e tau ana.

I te wā he tekau mā rima tau noa tōna pakeke, i titiro minamina te karapu NRL Warriors ki a Fabien Kiri, mea rawa ake ka waitohu ia i tētahi kirimana e whā tau te roa ki a rātou.

I tēnei wā, he tekau mā ono tau te pakeke o tēnei tauira nō te kura tamatāne tuarua o Te Papaioea, engari, me kotahi tau anō ia e tatari ana kia kuhu ai ki tā rātou pūnaha whakawhanake hei tērā tau.

Ehara i te mea ko ia anake e aro ana ki ōna awhero hākinakina whai utu. Ko Jordan Pineaha o te kura tamatāne tuarua o Ahuriri, he tekau mā whitu ōna tau, e tirohia ana e te kapa Chiefs.

Ka hūnuku ia ki Waikato hei tērā tau kia aruaru tonu atu i ōna wawata whutupaoro, arā, kia oti i a ia he tukinga taumata matua kotahi rau, otirā, kia eke pea ki ngā Ōpango ā tōna wā.