Kua puta toa ngā Chiefs i tā rātou tukinga ki ngā Highlanders

Wikitōria Day
  • Waikato/Te Waiariki

Ko te tangi a te pere kau tera i renarena i te papa whutupōro o Waikato ināpō. 

I te wehenga tuatahi, i roto i te miniti kotahi noa nei, i hāmenetia te kapa Chiefs, engari, nā ngā ringa hohoro ō Nanai Williams, i whakawhiwhia ki a rātau te piro tuatahi.

I kaha pakanga atu ngā Highlanders ki te rārangi ārai a ngā hoariri, kia kōtata ake rātau ki te rārangi piro.

I whai hua ērā mahi ā rātau, i mua i te haurua tuatahi i whai piro te pou mua o te kapa a John Hardie tā rātau piro tuatahi. Tekau mā ono ki te whitu ngā tatau.

I piki ake te kaha ki te kapa rangatira i te wāhanga tuarua. E ono miniti whai muri i te tangi o te whio, i parahutihuti te haere a Tāwera Kerr-Barlow, mea rawa ake ka whai piro a Liam Messam.

Nā tēnei hapa āraitanga a te kapa rangatira, i hāmenetia rātau. Nō reira, i riro i a Lima Sopoaga te piro hāmene mā ngā Highlanders.

I koke whakamua tonu te kapa o te hau kāinga, ā, nā te autāia o tēnei whana a te kāpene a Aaron Cruden, i whai wā a Charlie Ngātai ki te hopu i te pōro, kātahi ka whai piro ia i te kokonga matau.

Ahakoa te nanaiore a te kapa Highlanders kia toa ai i a rātau te kēmu, i puta anō te ihu o ngā toa tōmua o te whakataetae Super Rugby, arā te kapa Chiefs.

Rua tekau mā tahi ki te tekau mā iwa ngā tatau whakamutunga.