Kaupapa: Softball

Kua puāwai mai te Whakataetae Poiuka Māori, arā, ko Ngā Hau e Whā

Wikitōria Day
  • Tāmaki Makaurau

Ko te tauwhāinga e kiia nei ko Ngā Hau e Whā tērā i whakakao mai ai i ngā tini kaitākaro poiuka Māori.

He huihuinga hoki e whakatairangatia ai te pitomata o ngā uri nō ngā iwi maha, ā, ko tōna whāinga matua, kia nui ake ai ngā whānau Māori e tākaro ana i tēnei hākinakina.

Nā tēnei mihi whakatau ngā mahi tākaro o te rā i huataki ake.

He tauwhāinga kē tēnei kua roa e noho noa ana hei moemoeā i roto i ngā hinengaro o te tokomaha, engari, i te rangi nei kitea ai tōna whakatinanatanga.

He wā tēnei e whakaongaonga ai ngā ngākau o te hunga kua tae mai i ō rātau iwi, ā, ahakoa koinei te whakarewangatanga o te kaupapa, e rima kē ngā tīma tāne, e whā hoki ngā tīma wāhine.

Ko Ngāpuhi, ko Ngāti Porou, ko Ngāi Tūhoe, ko Tainui, ko Ngāti Pākeha hoki ngā iwi kua hāpai ake i tēnei kaupapa hōu.

Ahakoa he tauwhāinga tēnei, ko te whāinga matua, ko te whakawhanaungatanga.

He huarahi anō tēnei e taea ai e ngā toki kaitākaro te hoki ki waenganui i ō rātau iwi, ki te tuari atu i ō rātau pūkenga ki ngā uri whakatipu.  

E tauriterite ana ngā whakaaro o ēnei kaitākaro pūmanawa Māori, arā, kia haere tonu tēnei kaupapa, ā, haere ake nei.