Kaupapa: Rugby

Kua oti te tau tākaro ipu ITM a Rene Ranger

  • Tāmaki Makaurau

He rongo kawa anō ki ngā taringa a te hunga kaitākaro whutupōro, engari, koia i tau ai ki a Rene Ranger i te rangi nei.

Rua tekau mā waru tau te pakeke a te kāpene Taniwha ō-mua nei, ā, nō tana haina kirimana ki te uepu whutupōro o Te Rakipaewhenua, me te kapa Kahurangi anō, kua āta kitea mai e Te Kāea koinei te pito whakamutunga o te huarahi ITM i tēnei tau māna.

I hoki mai a Ranger ki te kāinga i te tīmatanga o tēnei tau tonu, ā, he mātātoa e rua tau te roa tāna ki Wīwī me te karapu whutupōro o Montpellier i reira.  I pokaia rā a Ranger i tōna hokinga mai whai muri i te kitenga mai o te hē o ētahi wahanga o tōna kakī, o tōna tuara anō hoki.  He nui nō te patu i tōna tinana te take.

Nō te rā nei, whakamōhiotia mai e te kaihautū o te kapa o Te Rakipaewhenua e Peter White, “E mate ana ā roto” tā rātou whetū o te wā, ka mutu, kua katia moatatia nei tōna tau tākaro i mua rā anō i tōna tīmatanga mai.

E ai ki ngā rongorongo o te wā, kei te whitawhita pai a Ranger, engari, nā ngā tohutohu o te kāhui tākuta o te kapa ia i panaia ai i tēnei tau.

Kāore tēnei i te rongopai mā te kapa o Te Rakipaewhenua nō rātou e takatū anō nei ki te mura o te ahi.

Ko te kapa o Ōtākou te kapa manuhiri ki te taiwhanga o Te Rakipaewhenua hei te Rāpare e tū mai nei.