Kaupapa: Touch Rugby

Kua kapohia te taitara e Te Māhurehure

Rahia Timutimu

I te whiringa toa o te reanga wahine kei raro ngā pakeke i te rua tekau mā tahi, he pakanga i waenga ia Ahitereiria me Aotearoa, arā ko Poihākena me Te Māhurehure.

I ngā mēneti tuatahi o te tukinga, i tata ngā kapa e rua ki te whai piro, engari, auare ake.

Koinei te āhuatanga i kite i te haurua tuatahi, i tata hipa ngā taha e rua i te rārangi piro, engari ka miere.

He maha ngā wā i tata hipa atu a Te Māhurehure i te rārangi, heoi nā ngā hapa paku i raru ai rātou.

I te mēneti tekau rāno ka ea ai a Poihākena, me te whai i te piro tuatahi o te tukinga.

Ko Poihākena te kapa i ārahi i te wehenga rua, he tahi ki te kore ngā tatau, nā tēnei he kōrero i puta ki waenga i te kapa o Te Māhurehure i te haurua.

Ko Te Māhurehure te kapa tuatahi ki te whai i te piro tuatahi o te wāhanga tuarua, kia ōrite ngā tatau.

Heoi he ngāwari mā Te Mahurehure ki te whati i te rārangi ārai, me te whai i tēnei piro ngāwari i mua i te tangi o te wheo.

I te mutunga iho, he pakari rawa a Te Māhurehure, me te wikitōria e rua ki te tahi.