Ngā kaupapa: Rugby, Rugby League, NRL

Kua kapo i a Taumutu Nohotima i ngā mata o ngā Canberra Raiders

Ka tūtaki atu i tētahi uri o Ngāti Porou me Tūhoe ka whakangungu e iwa ngā wā i te wiki, e kotahi rau iwa tekau mā tahi henemita te tāroa, e kotahi rau mā whā kirokaramu te taumaha. 

Nā tōna kōpaka me tōna nakawhiti kua kapo i a ia ngā mata o ngā Canberra Raiders.

E herea ana ōna pūtu, me te manako ia ka herea ia ki te kapa i raro i te 20 tau te pakeke o ngā Raiders.

E ai ki a Taumutu Afemui-Nohotima, “Āhua hīkaka te ngākau, he māhaki te ngākau, engari kei te mōhio au he rahi nga mahi ki kō.”

I tae atu ngā kapa NRL katoa ki te whakataetae rīki kura tuarua ā-motu, ko Taumutu Afemui-Nohotima tētahi i kapohia kia whakamātau ai mō ngā Raiders hei te mutunga o te tau.

Hei tā Asaeli Afemui-Nohotima, “Kei te tino koa te ngākau, e mōhio ana te whānau he tīmatatanga noa tēnei.”

I tipu ia i te whutupōro, ā, nō tērā tau noa iho tīmata ai ia te tākaro rīki mo tōna kura, mō Manukura, ā, ko tāna ko te waiaro tika te mea nui.

Ki tā Taumutu Afemui-Nohotima, “He whakatauki hoki mai rā anō, e kore te ngākau i roto, kāore te hōnore i roto.  Ā, koina e mura ana i taku ahi.”

E tika hoki ana tōna waiaro ako, kei te mōhio kē ia ki tana whāinga mātauranga mō muri i te kura tuarua.

E ai ki a Taumutu Afemui-Nohotima, “Haere au te whare wānanga te ako i te pacify engineering me te civil engineering.”

Ā, ki te eke ia i te rīki, kotahi anake te īnoi a tōna matua.

Hei tā Asaeli Afemui-Nohotima, “Whakahokia mai te poraka tuatahi ki tana kura i whakarite i a ia ki tēnei mahi.”