Kua kapo a Heta-Morris i tōna taitara mamau-a-ringa tuawaru

Aroha Treacher
  • Te Tai Rāwhiti

Kua kapongia te taitara mamau-a-ringa toa e Maateiwarangi Heta-Morris, kua waru ngā tau ināianei aia e eke panuku i te whakataetae mamau-a-ringa a te motu, i tēnei tau i tū ai ki Turanga, te wā tuatahi i tū ai te whakataetae nei kei waho o Tāmaki Makaurau. 

"Ae, kua hari heoi kei te whakaheke tōtā ahau mō āku tamariki," tā Heta-Morris.

Nō Rotorua, i timata ai ia i tēnei huarahi i aia e rua tekau mā tahi ōna tau, i whakaharatau aia me tōna hoa tata ki rō tōna karāti, mai i taua wā kua huhua kē ana taitara toa i kōnei ki tawaahi anō hoki, ko te whainga nui, kia tū ia hei toa o te ao.

"Kua takoto te manuka e Ryan Bowen, koia te toa ki Ahitereiria, hei tērā Rāhoroi ka whakataetae au ki tētahi whare hākinakina ki Ipswich, ko tāku e hiahia ai kia whati i tōna ringa."

Kāore a Aotearoa i te tino aro ki tēnei hākinakina ki ērā o te ao, i whakarewa noa iho ai te uepu mamau-a ringa i te tau rua mano tekau mā toru.

"Ae, kua tipu te hākinakina nei ki Turanga otira ki te motu whānui, i kite au i te maha o ngā tāngata te mamau ringa mai i tōku kuhunga ki te hākinakina nei i te tau rua mano tekau mā whā," tā John Leach, te toa U100kg.

Ko Heta-Morris tētahi o ngā kaiwhakataetae rua tekau me ngā karapu e rima pea me a rātou kaiwhakataetae wāhine tāne toa.