Kaupapa: Rugby League

Kua hono atu ngā tuāhine Peters ki te kapa Kiwi Ferns

Wikitōria Day
  • Tāmaki Makaurau

 Mō te wā tuatahi, kua whai urunga ētahi tuāhine Māori, he tauira ō-mua o Te Kura Māori o Ngā Tapuwae, ki te kapa Kiwi Ferns.

Nā tēnei kua pūmau ake te hononga ki waenganui i a rātau, ā, e kaikā ana rātau kia tākaro ngātahi i te tukinga ki a Ahitereiria a tērā marama. 

Koinei te wā tuatahi kua whai urunga a Hilda Peters ki te kapa Kiwi Ferns.  Kua whai tūranga kē āna teina a Rona rāua ko Kahurangi i ngā tau ki muri, nō reira, e hiamo ana ngā ngākau o te tokotoru nei.

Inā te nui o ngā pūkenga me mau e te kaihākinakina rīki, ā, e mārama ana te kite, kei ēnei tuāhine Māori ngā pūkenga e whai hua ai te kapa.

Ehara i te mahi māmā kia tākaro ngātahi ki ō teina, tuakana hoki, hēoi, hei tā Kahurangi rāua ko Rona, he kaha a Hilda ki te akiaki i a rāua tahi i runga i te papa tākaro.

Arā hoki te tūmanako kia tākaro ngātahi tonu ai rātau a ngā rā kei tua.

Mā tō rātau manawanui, e tutuki tonu ai i a rātau ō rātau ake wawata.