Ngā kaupapa: Sevens, Rugby

Kua hoki mai te toa takiwhitu a Portia ki te kāinga

  • Te Tai Tokerau
  • Tāmaki Makaurau
Portia Woodman, NZ Sevens - Photo / file

Kua hoki mai te whetu o Ngāpuhi a Portia Woodman me tana kapa whutupaoro takiwhitu wāhine toa o Aotearoa ki te wā kāinga. Hāunga rā tāna piro i te whiringa toa o te whakataetae takiwhitu ki Brazil kia eke ai te kapa, koia hoki te kaitākaro tuatahi i te ao ki te eke ki te ono tekau piro mai anō i te tīmatanga o ngā huringa takiwhitu ā ao i te tau rua mano tekau mā rua.

Harikoa ana a Portia kua hoki mai ki te kāinga kātahi, kārua kia noho ngatahi ai ki tōna whānau.

Hei tā Portia Woodman nō Ngāpuhi, "Me oho tonu ahau mō te katoa o te rangi engari ko te painga kia noho tahi ki ōku mātua."


I whara tōna tuara i tērā tau, i te whakataetae a motu ki Rotorua anō i tērā marama engari kua hoki mai ia ki te keokeonga o tana tākaro, tekau mā toru ana piro ki Brazil, ko tēnei tana piro nui whakaharahara kia eke ai rātou i te whiringa toa ki a Ahitereiria, ā, kua tohua hoki ia ko te toa o te whakataetae.

"I mau te pōro, engari nā te mahi a te kapa katoa nā te mea ehara taku toa i te toa takitahi engari i te toa takitini," te kī a Woodman.

Harikoa ana hoki tōna pāpā a Kawhena kua hoki mai a ia ki te kāinga, "Kātahi anō ia ka hoki ki te papatākaro ka whara ia, te whāinga o māua kia kaha ia, kia māia kia manawanui hoki, ērā ngā hua ka puta, he mea tino rawe."
 

Heoi e whakapono ana a Kawhena, he kaitākaro Ōpango o mua, nōna ngā pūkenga o Portia, "I taku nei mahara āe, tino harikoa ki tērā, koina te kī o taku hoa, o taku whanaunga ki ahau, ōrite ia ki a māua ko tōku tuakana a Fred, tino ōrite ana a Portia."

Ko te aronga nui i tēnei tau, ko te whai wāhi ki ngā taumāhekeheke o te ao hei tērā tau, nā reira hei te mutunga o te whakataetae i whai wāhi te kapa kia whakatairanga i te hākinakina me te āta titiro hoki i te papatākaro mō tēra tātāwhāinga nui.

Heoi, nā te wairua angitū o tana kapa, me te tautoko angitū o te kainga, he tau angitū anō kei te haere mai mā Portia.