Ngā kaupapa: 28th Māori Battalion, Rugby

Kua hinga tētahi o ngā ika-ā-whiro whakamutunga o te Rua Tekau mā Waru o te Wairarapa

Te Kāea
  • Te Tai Rāwhiti

Ki te whare o aituā, kua hinga tētahi o ngā ika-ā-whiro whakamutunga o te Rua Tekau Mā Waru i te rohe o te Wairarapa, ko Kīngi Matthews, waru tekau mā waru ōna tau tērā ka ngaro nei, ā, e takoto ana ki te marae o Pāpāwai ki Te Hūpēnui.

I uru atu te uri nei o Kahungunu me Rangitāne ki te Hokowhitu-a-Tū i te tau tahi mano iwa rau whā tekau mā whā, ā, i tukuna atu ia ki Itāria me te ope tānga tekau mā rua.

He pūkenga anō ki te papa whutupōro, ko ia te ika-ā-whiro whakamutunga rawa nō te kapa Ōpango Māori, he perehitini o mua hoki a ia o te Uniana Whutupaoro o Wairarapa Bush.

I tēnei rā i tae atu ngā ope hapori, ope iwi, me ētahi o te Ope o Tūmatauenga i mua i tōna uhunga a te Rāpa.

E ai ki a Paora Ammuson, “He nui tonu ngā manuhiri kua haere mai ki te marae, mai ngā rōpū a-iwi, ā-hapu, ā-hapori ki konei ki roto i Te Wairarapa.  Ko ia te morehu whakamutunga o Wairarapa i wehe atu ki te pakanga rā i roto i te Rua Tekau Mā Waru, te ope o te rōpū Kamupene D e kī a nei ko ngā kaupoi.  He tino toa hoki tō mātou pāpā i runga i te papa purei whutu pōrō, ko ia te tino pakeke o ngā toa Māori i tākaro mō te tīma Māori o Aotearoa, ko tēnei matua te tino pakeke o ērā toa kua purei mō te tīma rā.”