Kaupapa: Waka Ama

Kua eke ngā kapa V6 1000 mita te tawhiti ki ngā whakataetae waka ama a Ao.

Rahia Timutimu
  • Te Tai Tokerau
  • Tāmaki Makaurau
  • Waikato/Te Waiariki
  • Te Tai Hauāuru
  • Te Tai Rāwhiti
  • Te Whanganui-ā-Tara
  • Te Waipounamu
  • Ahitereiria

Ki te  rēhi tuatoru o te rā, ko ngā wāhine rima tekau tau te pakeke, neke atu. Toa ai i a Ngaruroa nō Ruamata i te mētara rauwhero.

Ki ngā pēperekōu o te whakataetae, mō ngā wāhine whitu tekau tau piki ake, ko Te Ara Pounamu nō Aratika tērā i whakawhiti tuatoru ai i te rārangi, i tēnei rēhi rima rau mita te tawhiti, kotahi te huringa.

“He pai, ko tā mātou mahi he kōrero i mua i te rēhi, kia mahi i ngā mea ngāwari kia pai,” hei tā Karen Mahuika.

Engari ko ngā tāne ērā o tērā wāhanga tonu i eke mārika i tā rātou i hiahiatia ai, ko te mētara koura tā Kōtuku nō Parihaka Waka Ama.

A i tōaitia e Ngā Kōpara toa tērā hua, kia whakawhiwhia ki te turanga tuatahi. Eke ai te kapa nō Horouta Waka Hoe i te taumata hei toa o te ao mō te hunga whā tekau tau te pakeke, piki ake.

Mō te hunga i raro iho i te tekau mā iwa tau, ko te turanga tuatahi, tuarua hoki tā Aotearoa i tēnei rēhi tahi mano mita te tawhiti. Ko Tiare Māori tērā i eke, hei toa, ko Hinetoa nō Horouta i tae tuarua mai ai.

Nā wai i kaha, ka kaha kē atu ngā kapa nō Aotearoa, mō te hunga ono tekau tau piki ake, ko Team Taitokerau i whakawhiwhia ki te mētara koura.

Hei tā te mema o te kapa, hei tā Hilda Harawira, “Tino rawe te tīma nei, ahakoa i te tino wiriwiri i te ata nei, kua mahi, kua whakangungu mō te wā roa, engari kua tutuki kua puawai, ā, harikoa ana te tima o te taitokerau, e whakanui ana i te mana wahine o taua rohe o Ngāpuhi nui tonu.”

Ki te wāhanga ika ā whiro wāhine, e whā ngā kapa nō Aotearoa i tēnei rēhi, tahi mano rima rau mita te tawhiti.

He pakari rawa atu a Tahiti, heoi anō he mētara Hiriwa tā Kaiarahi Toa nō Horouta, mētara rauwhero hoki tā Roto Wahinez nō Taniwha.

Hei apōpō tū ai te rā whakamutunga o te whakataetae nei, mō ngā rēhi rima rau mita te tawhiti ki ngā waka takiono.