Kua ara mai he tētēkura tokorua poirewa i te whakataetae ā-motu mō ngā kura tuarua

Aroha Treacher
  • Tāmaki Makaurau

Ka tō te rā ki te whakataetae poirewa mā ngā kura tuarua o Aotearoa i te rā nei, ā, he kotahi rau whā tekau mā rima ngā tira i whakataetae atu, tae atu ki tētahi tokorua taputapu kē nei te hanga, ki a Kahurangi Robinson rāua ko tōna hoa tākaro, ko Nate Moore. Hei tēnei Rātapu ka ahu atu rāua ki Tairana hei kanohi mō Aotearoa i te whakataetae poirewa one o Āhia, ā, ki te eke panuku rāua, tērā pea ka kitea rāua ki ngā taumāhekeheke Orimipia taiohi.

Nā tōna manawa tītī ki te mahi me te whakaharatau, kua whai hua a Kahurangi Robinson i tēnei wā.

Hei tā Kahurangi Robinson, nō Ngāti Porou, “He mea nui whakaharahara tēnei ki te whakakanohi i tō whenua taurikura i roto i ngā mahi hākinakina nei”

Ka taki atu a Kahurangi ki Tairana mō te whakataetae poirewa one o Āhia me tōna hoa takaro, me Nate Moore.

Hei tā Nate kōrero e mea nei “He taumata tākaro ana kei te kitea ki reira, ko te tāroaroa hoki o ētahi o ā rātou kaitākaro”

Kāti, kua toru tau a Kahurangi e whai wāhi atu ana ki tēnei hākinakina, otirā, kua eke panuku marika a ia, kua tohua ki ētahi tira poirewa rō-whare, poirewa one hoki o Aotearoa.

E ai ki tō rātou kaiako, ki a Paora Morrison, “he nui ngā pūkenga kei te tokorua nei, me te mea anō hoki, kua waia rāua ki a rāua ano. He hoa tino piripono rāua”

E hiahia ana te tokorua nei kia eke anō rā kia kapohia ake ai tētahi o ngā tūranga e ono, e whai tūranga whakatatae atu ai rāua ki ngā taumāhekeheke Orimipia taiohi