Kotahi noa te wikitōria kia kapohia ai te Ipu e Team NZ

Kotahi noa te wikitōria e toe ana kia kapohia ai te ipu Amerika e Tīma Aotearoa whai muri i tā rātou toahanga kotahi i te ata nei, kia ārahi te whakataetae, e waru ki te kotahi.

Ko tētahi i kite ā-kanohi atu i ngā nekenekehanga i runga i te moana, ko te uri o Te Rarawa kai whare, ko Scott Martin, tētahi o ngā tautiaki o Te Tīma Aotearoa.

I te tīmatanga o te rā, e rua noa ngā wikitōria e toe ana kia kapohia ake ai te Ipu Amerika, ā, i pai hoki tā rātou tīmatanga i te reihi tuatahi.

I mau tonu ai i a Aotearoa tērā āputa engari i puta te ihu o Oracle i te tīmatanga o te wāhanga kake.

Heoi tērā tonu te angitū o Aotearoa kia ārahi anō i te reihi.

Ahakoa i hoki kaha mai a Oracle kia whakatata atu ki a Tīma Aotearoa i te māka whakamutunga, i noho tau tonu ngā Kiwi kia kōkiri tere ai ki te rārangi mutunga, wikitōria ai mā te tekau mā rima hēkona.

I a Dean Barker mā e tutuki ai ngā mahi ki runga i te moana, e pukumahi ana a Scott ki te tiaki pai i a rātou me te wāhi o Tīma Aotearoa i San Francisco.

I kōrero motuhake mai a Scott Martin ki a Te Kāea mō te wairua o reira.

"Kei muri i ahau inaiānei kātahi anō ka hoki mai te waka, ka hoki mai ki te whenua nei, arā ka haere rō whare mō te pō nei kia whakareri anō mō te reihi āpōpō.

Hīkaka rawa te wairua, mēna ka haere ki runga i ngā tiriti ki te wāhi mātaki i ngā reihi kei reira ngā tīhāte pango, ngā haki o Aotearoa e rere ana i reira.

Ko au tētahi o ngā tautiaki, he tīma tautiaki tā mātou mō te tīma o Aotearoa, ka mahi tahi hoki mātou me tētahi tīma tautiaki nō konei, he tīma o Amerika, ka mahi mātou ki te tiaki i te tīma i te pōti, arā, i ngā whare katoa e tū mai nei."

Kāhore e kore ko te hiahia a Scott me te kapa katoa o Tīma Aotearoa kia whakaeangia tā rātou whai āpōpō.