Kotahi ki te tahi te otinga o te takaro i waenga i Aotearoa me Hōrana

updated Wikitōria Day
NZ Black Sticks Women's hockey team - Photo / facebook.com/nzblacksticks

He otinga ōrite kē ngā kaute i te tukinga a te kapa Rākau Pango Wāhine o Aotearoa ki a Hōrana i te whakataetae ipu FIH Champions Trophy ki Ākētīna.

Ko Hōrana te kapa toa o te ao, ā, kāre anō a Aotearoa kia whakahinga i a rātau, mai anō i te tau kotahi mano iwa rau whitu tekau mā rima.

Heoi, e hiahia ana tō tātau kapa ki te panoni i tērā, ki te tūpono tūtaki rātau ki a rātau anō i ngā whiringa whāiti.

I haere mātātoa atu te kapa haupoi wāhine o Aotearoa ki runga i te papa tākaro, i tēnei tā rātau kēmu puna tuarua.

Kāre he piro i pahawa i ngā kapa e rua i te hauwhā tuatahi. I whai wā a Hōrana ki te whai piro i te hauwhā tuatoru, engari auare ake.

He roa tā Hōrana noho ki tō rātau ake porohita kōkiri, me te aha, i whakawhiwhia ki a rātau tētahi kokonga hāmene whai muri iho i te tukinga o te pōro ki te waewae o Jordy Grant.

I angitū a Hōrana i tēnei whiwhinga, mea rawa ake, ka whai hua.

I tata puta te ihu o Aotearoa, heoi, nā tēnei rutu mōrikarika a Hōrana i riro kē i a rātau he kokonga hāmene. Kāre i tino tutuki i a rātau. 

Kāre e roa a muri i te huatakitanga o te hauwhā whakamutunga, i pīata mai a Aotearoa. Nā te rawe o te mahi ohu, i whiwhi i te kaikōkiri, i a Olivia Merry tēnei piro autaia. 

Ahakoa he pironga kore te hua mō te roanga ake o te kēmu, i pai tonu tā Aotearoa pakanga ki ngā toa o te ao. He kotahi ki te kotahi te otinga atu.

Kei mua ēnei kapa e tū nei i tō rātau puna, ā, hei te Raapa e tū mai ana tuki atu ai a Aotearoa ki te tira kei te taumata tuarima o te ao, arā, ki a Haina.