Kaupapa: Rugby

Kōrero Motuhake: He kirimana matua tā Wainui, i tana whakatahanga i tana kapa whutupōro ngaio

Tamati Tiananga
  • Waikato/Te Waiariki

Whai muri i tana tākaro me te kapa Chiefs ki ngā Blues i ngā rangi whakatā kua hipa, kua noho te paehau a Sean Wainui ki rāhaki, heoi anō e whakarite ana te uri Māori kia waitohu kirimana me ngā Chiefs mō te tau tākaro nei.

Inā noa ngā piki, inā hoki ngā heke mōna i tēnei tau tākaro.

I tērā tau,  i pāihi kau roto i tana rangona atu e kore tana kirimana e tōaitia e te kapa Crusaders. Heoi, he awhero i puta ake i tā te kapa Chiefs me tētahi kirimana harangotengote, kia whakakī ia i tētahi turanga mō te wā nei, me te manako, ka puta mai he kirimana matua mōna.

Whai muri i te wikitōria a te kapa Chiefs i ngā Blues, kua kiia mai e te kaiako o te kapa Chiefs, e Colin Cooper, he tūpono ka whakawhiwhia e ia ki tētahi kirimana matua.

He tūpono rawe tēnei mā te kaitākaro rangatahi nei. I tīmata mai ai hei kaitākaro whakakī whāruarua, nā wai rā ka puta ihu mai hei kaitākaro matua.

I te tokomaha o ngā kaitākaro o te kapa Chiefs e whara ana, te tikanga ka tino whai wāhi atu ai a Wainui ki te papa tākaro i tēnei tau.