Ko Waikato ngā toa o te whakataetae pā whutuporo ki raro i ngā tau rua tekau ma tahi

Rahia Timutimu
  • Tāmaki Makaurau

I te whiringa toa a ngā tāne kei raro ngā pakeke i te rua tekau mā tahi tau i Papakura, i waenga i a Tāmaki ki te Tonga me Waikato, ko te haukainga tēra i whai i te piro tuatahi i te meneti tuatahi anō.

E rua meneti i muri iho, i te rārangi anō rātau, ko Hauriri Harvey i whai hua tuarua mā Tāmaki ki te Tonga.  Taka iho te rima meneti kātahi ka hua ko Waikato.

I hokia anō te rārangi e ngā kapa e rua i mua i te wehenga rua, heoi ko Tāmaki ki te Tonga kē te ihu i puta, e toru ki te rua.

I rīra te ārai a ngā taha e rua, ā, kāore he piro i te tīmatanga o te haurua tuarua. Nā ngā kōrero akiaki pea o te wehenga i hika ai te arunga o te piro tuatahi i te haurua tuarua kia Waikato.

Ko Hauriri Harvey tētahi o ngā kaitākaro hei mātakitaki, i māmā noa tāna rapu i ngā āputa kia riro i tana piro tuarua o ngā piro e toru o te whiringa toa.

Heoi, ia te wā ka whai hua tētahi kapa, i whai hua anō te hoariri, kia noho ōrite ai ngā tatau.

Otira ko Waikato tēra i whai i te piro whakamutunga, kia wikitoria ai i te taitara o te motu, e waru ki te whitu ngā tatau whakamutunga.