Kaupapa: Waka Ama

Ko tētahi karapu Waka Ama e whakahono ana anō i āna kai-hoe ki ngā momo waka Māori rerekē

Te Kāea
  • Waikato/Te Waiariki

Ko Te Toki tētahi karapu waka ama ki Kirikiriroa e whakahono ana anō i āna kai-hoe ki ngā momo waka rerekē i whakamahia ai e te Māori.

Kei te whakarite, kei te whakatika, kia tōkihi te karapu o Te Toki ki runga.

E ai ki a Turanga Barclay-Kerr, “Ko te kaupapa ehara noa i te waka ama, he kaupapa waka katoa tō mātou karapu, nā reira ko ngā waka katoa, te waka ama, te waka taua, te waka haurua me ngā momo āhuatanga katoa ka taka mai i roto i te ao o te waka.”

Ko Turanga Barclay-Kerr te kaihautu o te karapu mō tēnei tau, ko ia e whai ana i ngā tapuwae o tōna Papa a Hoturoa Kerr.

Ki tā Barclay-Kerr, “Kua pēra i te āhuatanga o ngā mahi whakatere waka i runga anō i tō mātou tiaki, tō mātou whiwhi i te waka haurua o Haunui, nā tera kua kumea tēra kaupapa e tōku Papa. Ka noho mai tēnei ki te kainga nei ki te whakahaere i ngā mahi waka ama, kia pai tōnu te rere, kia pai tōnu te haere o ngā mahi katoa o te karapu.”

Hei tā Keho Allen, “He rawe ōna mahi, rawe ki ai a te kaihautu i ngā tamariki o tā mātou karapu, he kaha hoki tōna whakapau kaha ki te whakaharatau, ki te whakaū ia mātou, ki te akiaki ia mātou kia tae ki te panekiretanga.”

Ki roto i ngā mahi tohutohu o Te Toki, ki te hapa tētahi, mā te katoa e whakatika, ā, kia horo anō te whakatika, mai reira ka kaha ake te hononga tangata, kia ngātahi ai te hoe.

Ka oti ai ngā mahi me te karakia, wheoi he hononga anō ka kitea i roto i te powhiri o tetahi ki tetahi o tēnei karapu.

Ko Barclay-Kerr tērā e mea ana, “Ko tēra he mahi whakahono me kī ia mātou katoa kia kotahi te whakāro kia kotahi te rere o te wairua i roto ia mātou katoa o te karapu.”

Hei te Rāmere ka timata te whakataetae-ā-motu ki Karapiro.