Ko te whakataetae Iromahue a Ngāti Ruamahue

Wikitōria Day

Nō tērā tau i toko ake te wawata ō ngā uri o ngā marae kei raro iho i te marumaru o Ngāti Ruamahue, ki Ngā Puhi, kia whakatū i tētahi taiopenga pēnei i a Iron Māori ki Te Taitokerau.

Ā, inanahi rā i kitea te whakatinanatanga o tērā wawata i te huihuinga Ironmahue.

He kotahi kiromita te roa o te kauhoe, tekau kiromita te tawhiti o te oma mai i te whanga o Wainui ki te whanga o Mahinepua.

Koinei ko ngā whakaritenga o tēnei waka hauora kātahi anō ka whakamānuhia.

Kei te takiwā o te toru rau te hunga manawa tītī i ikapahi mai ki Wainui, ki reira takatū ai mō te wero kei mua i te aroaro.

Hei tā Sailor Morgan, “Te ataahua o tēnei kaupapa, mō ngā tāngata katoa, ēhara rā mō ngā tāngata e kaha ana ki te kauhoe, mō ngā tāngata e kaha ana ki te omaoma, engari mō ngā tāngata katoa, ngā whānau me ō rātau tamariki, mokopuna.”

Ko ētahi i hāere me tō rātau kotahi, hēoi, tērā hoki ētahi i whakatū rōpū kia kore e mokemoke ai te hāere.

E tino hiahia ana ngā kaiwhakahaere o Ironmahue kia tipu tonu tēnei kaupapa a ngā tau kei te heke.

Hei tā Sailor Morgan, “Kua tukuna atu te tono ki ngā marae e hiahia ana ki te hāere mai, kia whakatūria he tēneti kia āwhina atu i tō rātau nei marae.

“Ka tae mai rātau ki konei kia āwhina atu i ō rātau nei marae, i ō rātau nei hiahia.”